انا بنت عادية في تانيه ثانوي بحب اصحابي اوي بس فجأه حصلت مشاكل واتفرقنا اتخطبت لابن الجيران وهو كمان طلع كداب وطلع كان عايز يخطبني وبعدين يسيبني لان بابا مكنش عايزني اتخطب غير لما اخلص تعليم انا تعبت جدا ونفسيتي تعبت اوي كنت بشوف احلام وحشه مرعبه بجد لحد في يوم كنا في الشتا وكانت الدنيا بتمطر اوي وهوا جامد وعلشان انا البنت الوحيده لامي كانت لما بتلاقي الجو برد بتيجي تنام معايا فى الاوضه بس في اليوم دا ماما مسمعتش الهوا وفضلت نايمه لقيت باب اوضتي اتفتح وشخص تخين اوي جه نام جنبي على السرير انا اترعبت دي مش ماما حطيت راسي في البطانيه وحاولت انام بس مرعوبه لحد قبل الفجر الي نايم جنبي دا قام وفتح باب الاوضه ومشي انا فضلت صاحيه للصبح ولما ماما صحيت حكيتلها اللي حصل قالتلي اكيد بيتهيئلك في اليوم دا روحت المدرسه وانا مخنوقه اوي كل اصحابي كانوا مع بعض وانا قاعده لوحدي قلت يارب ينكد عليهم ذي ما هما سايبيني لوحدي
فجأه سمعت صوت صريخ على السلم دولة اصحابي وهما طالعين وقعو فوق بعض
و كلهم اتعوروا وبينزفوا من مناخيرهم فضلت واقفه بعيد وانا متضايقة اوي ايه دا انا دعيت عليهم ليه يارب سامحني
روحت البيت وانا نفسيتي تعبانه اوي وكالعاده غيرت هدومي وقعدت ع السرير بس المرادية لقيت الاوضه مليانه دخان
حاولت افتح الباب مفتحش فضلت اخبط على الباب بس صوت التليفزيون كان عالي ببص في سقف الاوضه لقيت واحده وشها اسود اوي وشعرها اسود وطويل لقيتها بتقولي
ماتخافيش انا هعملك الي انتي عايزاه وهحميكي بس قربي مني انا فضلت اصرخ واغمى عليا لقيت ماما بتقولي يلا علشان تتغدي ببص لقيت كل حاجه ذي ما هي في الاوضه ومفيش دخان ولا حاجه بس الاوضه كانت دافيه اوي خرجت اتغديت وخفت ادخل اوضتي روحت نمت في اوضة بابا حلمت بيها بتقولي انا هنا علشان اساعدك تاخدي حقك من الي قهروكي انا صحيت من النوم مرعوبه وحكيت لماما وماما قالتلي انتي بقالك فتره مش منتظمه في الصلاه ارجعي انتظمي تاني وقولي الاذكار وان شاء الله مش هيحصل حاجه وحشه فعلا عملت كدا بس كنت كل يوم بفضل اعيط لحد ما انام من اللي حصلي بعدها بحوالي شهر كنت واقفه في المطبخ لقيت خيال اسود داخل ناحية الحمام نديت بس محدش رد روحت اشوف مين لقيتها هياة واقفه في الحمام وصرخت صرخه جسمي كله قشعر فصرخت وجت ماما قالتلي مفيش حاجه وفعلا كان مفيش حاجه
فضلت فتره حاسه ان في حد بيراقبني بس مفيش حد قررت اروح لشيخ وفعلا سألت على شيخ ومعروف اوي روحت له اول لما شافني قالي قل اعوذ برب الفلق من شر ما خلق .... انا جسمي ساب وقشعر وكان قلبي هيقف .. سألته في ايه قالي مفيش ربنا معاكي يا بنتي بصي الي هقولك عليه تعمليه قولتله هو حضرتك تعرف انا جايه ليه قالي مش محتاج اسأل
قالي تشغلي سورة البقره في البيت على طول وجابلي مياه مقروء عليها وقالي تستحمي بالميا دي وبعدين ترميها في البحر او تسقي بيها زرع وربنا معاكي اهم حاجه تفضلي على وضوء والاذكار اوعي تنسيها والرقيه الشرعيه تسمعيها على طول انا مشيت وانا مستغربه وانا خارجه قالي لو حصل اي حاجه تكلميني قولتله حاضر وروحت البيت عملت ذي ما قالي وكانت المصيبه الكبيره لقيت صرخات في الاوضه ناس بتصرخ كأنهم بيتحرقو وفجأه الاوضه بقيت حر جدا خلصت وخرجت وفي اليوم دا نمت لقيتها بتصحيني قومي وبصوت مرعب وخشن انتي عارفه انتي عملتي ايه انتي حرقتي عشيرتي بس انا مش هسيبك صوتها كان وحش اوي كأنه صدى صوت وبيرج الاوضه قولتلها انا مش خايفه منك قالتلي متقوليش كدا وهي بتصرخ قولتلها لا انا مش خايفه وفضلت اقرأ ايه الكرسي لحد ما خرجت من الشباك وقالتلي هرجعلك تاني بس ساعتها مش هتعرفي تعملي معايا حاجه
تاني يوم مروحتش المدرسه فضلت في البيت امي راحت الشغل وابويا كمان واخواتي راحو المدرسه وانا لوحدي فضلت كويسه ومفيش حاجه فجأه الباب خبط قولت مين محدش رد قولت يمكن حد اخواتي بيستظرف فتحت الباب لقيت راجل شكله وحش اوي وهدومه مقطعه ومتوسخه رزعت الباب دخل ايده من الشراعه وحاول يفتح الباب وانا باصرخ قالي مفيش حد هيسمعك قولتله انت ايه اعوذ بالله من الشيطان الرجيم لقيت ايده اتحرقت قالي انا الشيطان وهوريكي فضلت اقرأ قرآن لحد ما اختفى دخلت الشقه مسكت التليفون علشان اطلب الشيخ حاجه خبطت ايدي ووقع التليفون على الارض نزلت اجيبه حاجه زقتني على الارض نمت على ضهري وهي فوقي ضوافرها مرعبه وهي كل ما تقرب ايدها مني ضوافرها تتقطم لاني كنت قبلها راقيه نفسي وهي تقولي بطلي بقى انا هاخدها وانا اقولها لأ مش هتخديها وبعدين عضتني في جنبي ومكان العضه ازرق قمت حطيت ايدي عليها وبايدي التانيه جبت الميا الي مقروء عليها من على الترابيزه ورشيتها بالميا صرخت فضلت تصرخ ووشها اتحرق وخرجت وهي بتقولي استنيني هرجعلك تاني
ولما ماما رجعت حكيتلها الي حصل خدتني وروحنا للشيخ قالي المشكله انها جنيه عاشقه .... ايه جنيه عاشقه اذاي مش المفروض ان جنيه يعني تطلع لواحد قالي هي طلعتلك انتي وهي الي فرقت بينك وبين اصحابك وهي الي عملت معاكي كل حاجه دلوقتي هي مشيت لانك قدرتي عليها بس هي مش هتسيبك ربنا معاكي يا بنتي المهم انك تفضلي تقرأي قرآن وتقولي الاذكار وتحافظي على الصلاه انتي كدا هتبقي اقوي منها روحنا انا وماما واحنا مرعوبين ومستنين هيحصل اية قعدنا فتره كبيره كويسين ومفيش اي حاجه بتحصل قولنا الموضوع انتهى لحد في يوم دخلت الجامعه ويومها كنت فرحانه اوي لان اصحابي الي كنت متخانقه معاهم لقيتهم جايين عليا وبيتكلمو معايا عادي كأننا مش متخاصمين وكمان طلعوا معايا في نفس الكليه قضيت يوم حلو اوي روحت البيت وانا مقتوله من التعب دخلت انام لسا هروح في النوم لقيت تعابين كتير حوليا على السرير لدرجة اني مش عارفه اتحرك فضلت اصرخ بس محدش سمعني لقيتها واقفه على باب الاوضه بتقولي دا اخر يوم هتفرحي فيه انا فضلت اصرخ لحد لما ماما دخلت عليا وفوقتني حكيتلها الي حصل قالتلي لأ احنا نروح للشيخ احسن ورجعنا للشيخ حكيتله اللي حصل قالي ربنا يستر وجه معانا البيت فضل يقرأ قرآن ويرش ميه مقروء عليها قرآن في اركان البيت ومشي الشيخ بالليل قولت لماما نامي معايا انا خايفه قالتلي طيب وفعلا نامت معايا نمت ولقيتحد بيخبط على ضهرى جامد لقيت الجنية بتصحيني من النوم ... ايه دا مااامااااااااا مااامااااااااااا حرام عليكي ايه دا نزلي امي بلاش امي فضلت اصرخ امي اترزعت على الارض وفضلت تنزف من مناخيرها بابا صحى واخواتي صحيو وعمي فضل يخبط على الباب بابا فتحله وحكيتلهم الي حصل اخدو ماما على المستشفى وفضلنا معاها لحد الصبح قولت ارجع البيت اجيبلها حاجه تغير هدومها رجعت لقيت باب الشقه مفتوح قولت يمكن اختي جت بس مفيش صوت اختى ولا ولادها على فكرا هي اختي من الاب بس علشان كدا قولتلكم انا البنت الوحيده لماما
فضلت انادي مفيش اي حد بيرد دخلت الشقه الباب اترزع مرة واحده ببص ورايا لقيت اتنين شكلهم وحش اوي ونار طالعه من وشهم قولتلهم اه هي الي باعتاكم انتو فاكريني هخاف منكم طبعا على طول متوضيا وبرقي نفسي كل نص ساعه فمش خايفه ببص لقيتهم عملو حواليا دايرة من نار قولتلهم برضو مش خايفه وبدأت اقرأ قرآن وهما يصرخو بصوت وحش اوي لحد ما لقيت واحد تالت وشه كله دم ومعاه سكينه بيشاورلي على رقبته كأنه بيقولي هدبحك ضحكت باستهزاء وقولتله تعالى انت كمان فضلت اقرأ لحد ما خلاص كل حاجه خلصت خدت الهدوم وقفلت الباب ورحت على المستشفى لقيتهم بيقولولي ماما بقيت كويسه وهتروح معانا رجعنا على البيت لقينا البيت مليان صراصير بطريقه مرعبه رشينا البيت وخرجنا قعدنا عند عمي شويه وبعدين رجعنا على البيت ما لقيناش حاجه شغلنا قرآن وفضلنا قاعدين في البيت فتره محصلش حاجه وبعدين جالي عريس كنت قاعده مخنوقه مع انه كان محترم وامور ومستواه التعليمي والمادي حلو جدا بس رفضته ليه معرفش و ف يوم دخلت اخد شاور فجأه لقيت الميا سودا اوي قفلت الحنفيه بس ما بتتقفلش والبانيو اتملى مياه جيت اخرج من البانيو مش عارفه اطلع صرخت بس محدش سمعنى حسيت ان هيغمى عليا بس فضلت ماسكه نفسي لحد ما لقيتها خارجه من الميا وبتحاول تغرقني فضلت اقاوم لحد لما ماما خبطت على الباب لقيت كل حاجه رجعت ذي ما كانت خرجت من الحمام وانا مرعوبه وبعدها فضلت استحمى بالميا الي مقروء عليها واصلى وادعي ربنا يخلصني وفضلت فتره كبيره كويسه خلصت جامعه واشتغلت بعد ما اشتغلت بحوالي شهر ببص برا المكتب لقيت نفس الراجل الي كان موجود ساعة النار وماسك السكينه وبيشاور عليا انا اترعبت وفي وقت الانصراف روحت لقيته على باب البيت واقف يبصلي قرأت قرآن لقيته اختفى دخلت البيت لقيت بابا بيقولي جالك عريس قولتله طيب اتغدى الاول وبعدين نشوف مين الي امه داعيه عليه دا قالي طيب عموما هو جاي النهارده علشان تشوفيه قولتله ماشي خلصنا وجه العريس بالليل وقعدنا مع بعض وكل حاجه تمام واتفقنا وحددنا معاد الخطوبه واتخطبنا طول فترة الخطوبه وانا بحلم باحلام مرعبه لحد الفرح اتجوزنا والحمدلله بعد اسبوع من جوازي داخله الحمام لقيته مليان دود اسود كميه رهيبه فتحت الشباك وفضلت اكب عليه مياه وامسح فيه لحد ما خلص وقولت لجوزي وطبعا انا كنت حكيتله على اللي بيحصل قالي انشاء الله خير متحطيش في دماغك
يومها بالليل شفت حد في المطبخ دخلت مالقيتش حد خرجت سمعت صوت رزع وخبط في المطبخ دخلت تاني ملقيتش حد اتصلت بجوزي طلع يدور ما لقاش حاجه المهم نمنا وتاني يوم صحيت على هوا ساقع مالي الاوضه كانت ساقعه تلج والهوا عمال يطير الستاير والمفارش المهم فضلت اقرأ قرآن لحد ما كل حاجه هديت
وفضلت كل يوم اشوف كوابيس مرعبه قطط وكلاب وتعابين وناس شكلها وحش اوي وبعد سنتين من الجواز مفيش حمل وكل يومين عند دكتور شكل جه يوم حلمت بيها وهي بتقولي عمرك ما هتحملي انا حكيت لجوزي قالي طيب انا هسأل على شيخ كويس ونروح له وفعلا سأل وفي حد قاله على شيخ كويس اوي روحناله قرأ عليا قرآن وقالي انتي عليكي جنيه عاشقه وهي قويه اوي وقالي على حاجات اعملها واداني عسل مقروء عليه قرآن واداني تمر وقالي آكل 7 تمرات الصبح قبل الفطار روحت وعملت كل اللي قالي عليه وتاني يوم كلت العسل والتمر وبعد الظهر حسيت بوجع جامد في بطني كأني بموت وترجيع اسود فضلت كدا لحد ما روحت للدكتور قالي ان معدتي كلها والكبد والكلى والمراراه والطحال والبنكرياس وجدار المعده فيهم التهاب شديد اوي اداني علاج بس انا كنت بموت وفضلت حوالي 10 ايام على الحاله دي لحد ما جاتلي وانا لواحدي وقالتلي انا مش هسيبك وفضلت تصرخ وتقولي مش هسيبك قولتلها وانا مش عايزاكي تسيبيني انا بحبك وانا بكلمها لفيت على شبابيك البيت كلها رشيت عليها مياة مقروء عليها وعلى الابواب كمان علشان متعرفش تخرج وبعد ما خلصت وقفت قدامها وفضلت اقرأ قرآن وارش المياة في البيت كله لحد ما لقيتها في ركن من اركان البيت وقولتلها انا كنت ممكن اسيبلك فرصه انك تمشي بس انتي بتمشي وترجعي تاني ورشيت عليها المياة وهي فضلت تصرخ صرخات رهيبه لحد ما اتحرقت وبقيت رماد اسود على الارض وبعدها حكيت لجوزي وللشيخ اللي حصل قالولي اني كدا بقيت كويسه وخلصت منها الحمدلله وحملت وخلفت بنوته ذي القمر وبعدها ولد عسول اوي بس من كام يوم شفت حاجه غريبه اوي نفس الراجل فاكرينه اللي كان موجود وقت دخول ماما المستشفى ساعة النار..... ببص من البلكونه لقيته واقف ومعاه نفس السكينه ببص ورايا لقيته واقف في الاوضه وقالي هاخد حق الي ماتو ....
